Saturday, May 7, 2011

तुझं घर ... तुझं अंगण...
तुझं हसणं...तुझं दिसणं...
तुझं मुल...तुझं करियर ...
तुझा स्वभाव... तुझा पती...
या साऱ्या जबाबदाऱ्या
तू अगदी सहज 'मॅनेज' करत असशील....
आणि तुझ्या जीवनातलं माझं अस्तित्व
ही 'तुझी' जबाबदारी होऊच शकत नाही...

पण फक्त एक सांग....
समज मी तुझ्या हातावरलं
किंवा पायावरलं ...
सहाव्वं बोट असतो
तर तू मला टाळू शकली असतीस ?

Sunday, May 1, 2011

रिमझिमणारी

स्वप्नामधली माझी आहे रिमझिमणारी
वा-यावरती झुलता झुलता दरवळणारी

पा-यासम ती चंचल आहे मी अनुभवले
मुक्त नदी ती बारा महिने खळखळणारी

पांघरले मी श्वास तिचे अन त्याच क्षणाला
भरली माझी खोल जखमही भळभळणारी

शांत पहाटे गोड सुरावट ऐकू येई
कोकिळकंठी तीच असावी गुणगुणणारी

असण्याचा संकेत मिळे पण दृष्य नसे ती
मंद हवा ती पानांमधुनी सळसळणारी

माफक आहे आशा देवा आज हवी मज
माझ्यामधल्या प्रतिभेवरती मरमिटणारी

ओळख नसता आज गवसली "प्रविण"ला
गजलेसाठी हसरी बुजरी थरथरणारी

Thursday, April 28, 2011

चार ओळी

खरडल्या चार ओळी,
रखडल्या फार ओळी..

जिवाला त्रास झाला,
अता सुचणार ओळी

कसे एकाग्र होऊ?
मनावर स्वार ओळी

किती त्वेषात म्हटल्या
तिने लाचार ओळी

व्यथेची वाफ झाली..
बरसल्या गार ओळी

लिहूया चल; जिथे ना-
कुणी पुसणार ओळी..!

रात्र आली

रात्र आली चांदण्याना माळुनी
अन पुन्हा गेली जिवाला जाळुनी

देत आलो मी जगाला उत्तरे
प्रश्न माझा राहिला रेंगाळुनी

यामुळे ना मांडला प्रस्ताव मी
वाटले देशील तू फेटाळुनी

वर्षु दे पाऊस स्पर्शाचा तुझ्या
रात्र सारी जाउ दे गंधाळुनी

सौख्य ना आले कधी भेटावया
घेतले दुःखास मी कवटाळुनी

तू दग्याने प्राण माझा घेतला
मी दिला असता तुला ओवाळुनी

आसवे

आज नयनी पुन्हा जागली आसवे
भंगली शांतता वाजली आसवे

लोक जातात नयनांवरी कोरड्या
हाय दिसती कुठे आतली आसवे

तू जरी धाडले शुद्ध हासू मला
पोचता पोचता जाहली आसवे

आठवांच्या तुझ्या या वरातीमधे
वेदना प्राशुनी नाचली आसवे

जाहलो मी अता आसवांची कबरमी
मला खोडुनी गाडली आसवे

ही गझलही नसे ही नसे गीतही
फक्त मी तुजपुढे ढाळली आसवे

प्राणात तुला जपले

प्राणात तुला जपले मी डोळ्यात न येऊ देता
गुणगुणतो गीत तुझे मी ओठात न येऊ देता

रडलो तर रडलो ऐसा कळलेच कुणाला नाही
हसलो तर हसलो हासू गालात न येऊ देता

(यासाठी मंदिर मस्जिद गरजेचे वाटे त्यांना
देवाला पुजता येते हृदयात न येऊ देता)

पाजावे जहर कुणाला हातून तुझ्या पाजावे
शंकेचा गंध जराही जहरात न येऊ देता

भरणार कधी ना ऐशा का झाल्या असत्या जखमा
जर डाव उधळला असता रंगात न येऊ देता

ज्या रातीसाठी केल्या बरबाद हजारो राती
काळाने नेले मजला ती रात न येऊ देता

भेट चोरटी...

आज तू खुशाल गाल लाल होत जाउदे,
भेट चोरटी जरा 'जहाल' होत जाउदे...

रोज मंद गंध होत अंतरंग व्यापतो,
आज अंग माखण्या गुलाल होत जाउदे

ठेवणीतला नकोस दागिना करू मला,
वापरातला तुझा रुमाल होत जाउदे !!

देह लोळतो किती सुखात साजणे तुझा,
हे न फार चांगले, तु 'हाल' होत जाउदे...

स्वप्न्-बिप्न सोड, आज थेट भेट नेटकी..
सारखी पुढेच वाटचाल होत जाउदे..

रोज रोज काय तेच गोड गोड बोलणे?
तू कधी कधी अशी धमाल होत जाउ दे..!

तोलतात शब्द शब्द खोल, बोलतात की-
"गालगाल गालगा"त चाल होत जाउदे..!!