रान या मनात गच्च, दाट पाहिजे !
मात्र त्यात एक चोरवाट पाहिजे !
हेच स्वप्न रात्र रोज रोज पाहते...
व्हायला अता तरी पहाट पाहिजे !
पाहिजे स्वतःस नाव कोणते तरी...
कोणता तरी जिण्यास घाट पाहिजे !
गुंतलास काय कौतुकात एवढा ?
रोज का तुला नवीन भाट पाहिजे ?
मागतो तुला कुठे समुद्र मी तुझा ?
फक्त एक मत्त, धुंद लाट पाहिजे !
व्यक्त व्हायला जमो; जमो न, शेवटी -
कल्पना तरी तुझी विराट पाहिजे !
मी न येथला; मला निघून जायचे...
जीवना, जरा तुझा फलाट पाहिजे !
No comments:
Post a Comment