तुझे ठसे...

पहा कधी ना कधी असेही घडेल काही..
नसेन मी, त्यामुळे तुझेही अडेल काही !


तुझे ठसे चेहर्‍यात माझ्या नकोस शोधू,
(मनात कोठेतरी तुला सापडेल काही !)


"कुठे असावा जुना जिव्हाळा?"कळेल ते ही,
तुला चांदणे बनून जेव्हा जडेल काही..


अढी जराशी, ललाटरेषा बनून गेली..
मला भिती- प्राक्तनास आता नडेल का ही?


सुखा, तुझे नेमके इरादे मला कळू दे..
नको विचारू- "व्यथा तुला आवडेल का ही?"


जुन्या स्मृतींनो, मनात माझ्या हळूच या रे
उठेल झोपेमधून आणि रडेल काही...


लिहून टाका खुशाल जे जे सुचेल ते ते,
खपेल काही, घरात थोडे पडेल काही...